కోట శర్మ

సీ.హారకేయూరాది-యాభరణంబులు    వేరుగా ననిపించు - వేరు గావు    నశియించెడివి రూప- నామంబు లగువేరు    మారనట్టి కనక - మవదు వేరు    అలలు బుద్బుదఫేన - లగుపించు వేరుగ    ఆధారమగు నీర - మవదు వేరు    నీరుబంగారముల్ - తీరుగ సత్యమె    అనయమౌ బ్రహ్మము - కసలు రూపు తే.రూపనామముల్ జగతికి - రూపమగును      భాతి యస్థి ప్రియములె యా - బ్రహ్మ రూపు      నామరూపములనువీడి - నపుడు  మనమె      అద్వితీయమౌ బ్రహ్మము- నరయ గలము        ...కోట శర్మ వివరణ: గొలుసు, గాజులు వంటి ఆభరణములు వేరు వేరు గా కనిపించినను అవి కేవలము నామ రూపములు గానే భిన్నములు. వాటికి ఉపాదానకారణమైన బంగారమే వాటి అసలు రూపము. బంగారముగా అవి అభిన్నములు. నామరూపములు త్యజించి చూడగా అవన్నీ ఒక్కటిగానే ( బంగారము గానే) గోచరిస్తాయి. బంగారము ఆ ఆభరణములు తయారు చేయకముందు, చేసిన తరువాత, అలాగే వాటిని కరిగించిన తరువాత కూడా ఉంటుంది. కాటట్టి బంగారము నిత్యము, సత్యము. కాని ఆభరణములు తయారుచేయటానికి ముందు లేవు. అలాగే వాటిని కరిగించాక ...

పేకాట ఏకాలముంగనిన నాకాలమందునను పేకాటలాడదగునే పేకాటరాయుడులు యేకాడికీవదల నాకాటలోకమనుచున్ పేకాటతోయఘులు ప్రాకారమున్నిలిపి యేకాకిలాబ్రతుకుచున్ నాకారులైయిటుల లోకాలనుమ్మరచి పేకాటతోగడపగన్ చేకావలిన్ దులిపి చేకాసులున్ కడకు జూకాలనూవదలకన్ రాకాసిలానిలిచి పేకాటనేయిలన పోకార్చుజీవితములన్ పేకాటజూదరులు ప్రాకాశమున్ దొలగి శోకాలలోముణుగునే పోకాలమేకలిగి ఢోకాలతోనలిగి బేకారులైకుములుగా రాకాలమందుగెలు పేఖాయమైనటుల నీకాశదేనికి సుమా పేకాటపోవిడిచి శోకాలుమాయమగు దాకా శివున్ వదలకన్ ఈకాలమందె,దహ రాకాశమందలిని రాకారునూగొలువురా శోకాలువైదొలగు శ్లోకాలతోదినము శ్రీకారమున్ పలుకరా!... కోట శర్మ అనాకాలము=వేళకానివేళ; అఘులు=పాపులు;  నాకారులు= పనికిమాలిన వారు; పోకార్చు = నాశనము చేయు;  చేకావలి= ఇంటిలోని డబ్బు ; చేకాసులు= చేతిలోని డబ్బు ;  ప్రాకాశము= కీర్తి, వెలుగు; దహరాకాశము= చిదాకాశము;  ముణుచు=ముంచు; ఢోకా=మోసం. నాకేటికాదనుచు నాకేమిపోదనుచు నాకేటిబెంగనుకొనిన్  పేకాటరాయుడులు పేకాటలోమునిగి పోకార్చుజీవితములన్ చేకాసులూవదిలి చేజేతులానలిగి చీకాకులేమిగులురా పేకాట...

అశ్వధాటి నేనే యనంతుడను నేనే యసంగుడను నేనే యలక్షణుడనున్ నేనే యచింత్యుడను నేనే ప్రకాశుడను నేనే నిరంజనుడనున్ నేనే యభిన్నుడను  నేనే  విముక్తుడను నేనే పరాత్పరుడనున్ నేనే చిదాత్ముడను నేనే తురీయుడను  నేనే యగోచరుడనున్..కోట శర్మ నేగాను బద్ధుడను  నేగాను దేహమును నేగాను మూడుపురముల్ నేగాను దృశ్యమును నేగాననిత్యుడను నేగాను పంచగుహలున్ నేగాను క్షేత్రమును నేగాను గ్రాహ్యమును నేగాను నామగుణముల్ నేగాను కార్యమును నేగాను రూపమును నేగాను గోచరమునున్ పంచగుహలు = పంచకోశములు (అన్నమయ, ప్రాణమయ, మనోమయ, విజ్ఞానమయ, ఆనందమయ కోశములు) మూడు పురములు = స్థూలశరీరము, సూక్ష్మశరీరము, కారణశరీరములు .

మాదక ద్రవ్యం బాధక ద్రవ్యం లేదిక భవ్యం రాదిక సౌఖ్యం వాడుకనైతే వాడిక నాశం వాడక సతతం వీడు తక్షణం వేడుక కాదది వీడక తప్పదు గంజాయి చరస్ గుడుంబా కొకైన్ ఇంకేదైనన్ ఏపేరున్నన్ తాకకెప్పుడూ ఎంతజెప్పినన్ స్వప్నమునైనన్ ఆటలకైనన్ చిన్నలు పెద్దలు ఎవ్వరి నైనన్ అలవడినంతనె బానిస చేయున్ వేదనలిచ్చును మోదము కాదది రోదనలేయిక జీవితమంతా వాదనలెందుకు వేదముగావిను కాదనుకుంటే ఆటనుకుంటే జోలికి పోతే బానిస వౌదువు జబ్బులువచ్చును డబ్బులు పోవును జైలులు శిక్షలు తిప్పలు తప్పవు ఊరక పోదది ఊరిని ముంచును చూపును నీకది నరకపుటంచును మత్తుపదార్ధం బొత్తిగ వ్యర్ధం విత్తం చిత్తం వత్తిడి మొత్తం సత్తువ నెత్తురు చిత్తై చత్తురు అత్తరమిత్తఱి వీడుము మత్తును నాశము సర్వం సేయును తథ్యం   మాదక ద్రవ్యం బాధక ద్రవ్యం .. కోట శర్మ అత్తరమిత్తఱి = త్వరగా ఇప్పుడు ఇత్తల = ఇవతల ; అత్తల = అవతల ; ఇత్తఱి = ఇప్పుడు ; అత్తఱి = అప్పుడు ; ఎత్తఱి = ఎప్పుడు ; ఎత్తరతత్తరచేయు = ఉక్కిరిబిక్కిరి చేయు ; సత్తెం = నిజం ; అత్తరము = త్వర...

కం. తనువే తానుగ తలచెడి మనసే కారణము జనన మరణమ్ములకున్  తనలో తలపులు నిలుపగ మన మనసే ముక్తినిచ్చు మార్గము చూపున్..కోట శర్మ

తత్వ చింతన - అవస్థాత్రయ వివరణ కం. మెలకువ నిదుర కలలను       త్రిలోక ములలో మనుజుడు తిరుగును నిలలో       మెళుకువతో లోకమ్ములు       తిలకించగ విదితమగును తీరు తరింపన్ కం. మెలగును తనువూ మనసూ        మెలకువలో, మనసొకటియె మెదలును కలలో        కలిపించి లేని జగతిని,        కలలుకనని నిదురలోన కనబడ వేవీ! కం. మెలకువ లో కనబడునవి        కలలో నుండవు, కలిపిత కల కనుమరుగౌ        మెలకువలో, మాయమగు స        కలము నిదురలో, సకలము కనునది నీవే.... కోట శర్మ ఛందస్సు లో దోషములున్న దయచేసి తెలియజేయగలరు 🙏 వివరణ: జ్ఞాన మార్గమున ఆత్మవిచారణకు తద్వారా అపరోక్షానుభూతికి అవస్థాత్రయ పరిశీలన మావశ్యకము. జాగ్రదావస్థ, స్వప్నావస్థ, సుషుప్తావస్థ అనగా గాఢనిద్రలు అందరికీ అనుభవములోనున్న విషయాలే. మెలకువగా ఉన్నప్పుడు మనిషి కర్మేంద్రియములు, జ్ఞానేంద్రియములతో పాటు అంతఃకరణముతో వ్యవహరిస్తాడు. కాని కలలో కేవలము మనసుతో మాత్రమే మెలగును. కలలు లేని గాఢనిద్ర యందు మనస...

పేకాట ఏకాలముంగనిన నాకాలమందునను పేకాటలాడదగునే పేకాటలోగెలిచి నేకోటలేకొనుదు నాకేటిబెంగనుకొనిన్ పేకాటతోయఘులు ప్రాకారమేనిలిపి ఏకాకిలాబ్రతుకుతూ నాకారులైయిటుల లోకాలనేమరచి పేకాటతోగడపగా రాకాసిలానిలిచె పేకాటనేయిలన పోకార్చుజూదరులనూ చేకావలిన్ దులిపి చేకాసులూకడకు జూకాలనూవదలకన్ ఢోకాలతోనలిగి చీకాకులేమిగులు పీకేయగానిలువునన్ రాకాలమందుగెలు పేఖాయమైనటుల పోకళ్లుపోవలదురా పోకాలమేకలిగి ప్రాకాశమున్ దొలగి శోకాలలోముణుచురా నాకేటికాదనుచు నాకేమిపోదనుచు బేకారుమాటలిడిచీ పేకాటపోవిడిచి శోకాలనేకములు నాకేలకావుమనుచూ లోకేశుకోరు , దహ రాకాశమందలిని రాకారునూగొలువురా శోకాలువైదొలగు శ్లోకాలతోదినము శ్రీకారమున్ పలుకరా!

రామభక్త హనుమ తన రధమున రథి దాసరధి యని   కపివరుండెరుగక కాదు   అంతరంగమున నిరంతరముగ ఎగిసే భక్తిభావ తరంగములు   తరుగకయే తన రవరవమున రవించే   రాఘవ నామ రావము రక్షణగా , ఇక్ష్వాకు ని   కరుణా కటాక్ష వీక్షణమనుక్షణముండాలని , ఆరాముని ఆత్మారాముని చేసి   తన హృదయారామమున నిర్విరామముగ తలచే   హనుమకు , సీతారాములు సుతరాము రామని మారాము   చేసి మది లో నిలచే . వాయునందను డెందము   నందెందెందు జూచిన   కోదండుడు మహదానందుడుగ ముందుండు .... కోట శర్మ

తాత చిప్ప తరతరాలు కనిపెంచిన తలిదండ్రులు కనిపించెడి దేవతలుగ అనిపించని అర్భకులకు... వినిపించెద హితము కోరి కనిపించని దేవతలకు వినుతించిన నేమొరగదు నినుపెంచిన దేవతలే సుఖియించని పక్షములో చనుదెంచిన పిదప నీవు విలపించుట తగదుగాన కలహించక, కలకాలము అలరించుము అనురక్తితొ పరికించక నామాటలు తిలకించక సత్యంబును విరసించిన తలిదండ్రిని విసిగించిన నీవారిని వికటించును నీదు బతుకు నువుపెంచిన నీకొడుకే తలపించును తలిదండ్రిని తాతచిప్ప తరతరాలు అనుచందము నిను చూడక అసహించును చివరి వరకు సవరించుకొ నీ మార్గము కలిగించుము ఆనందము మురిపించుతు కన్నోరిని కరుణించును కమలాక్షుడు

హాసప్రియుడు దరహాసవదనుడు   ప్రాసప్రియుడు చిరు ప్రాయుడెపుడు కష్టమైన గాని కాస్టింగు తో ఇచ్చె స్ఫూర్తి ఇష్టమైన యాస్ట్రోను నిష్టగా జేసె పూర్తి నిత్యసంతుష్టి కి నమ్మ లేని షష్టి పూర్తి జాతకాలాయనకు కరతలామలకము ఏలినాటీ శనికి ఏమీ లేదిక పని. కష్టములు మరచేవు   ప్రాసతో మాట్లాడ కాస్సేపు వాడ్రేవు మా ఆప్తమిత్రువు అజాత శత్రువు ఆదినారాయణ గారు నిత్య పారాయణతో భావికాలములలో   భవ్యకీర్తులతోడ భాగ్యములు ప్రఫుల్లమై ఇల్లన ప్రఫుల్ల గారుండ ఎల్లెడల ఉల్లము ప్రఫుల్ల మై కనకదుర్గమ్మ కరుణా వీక్షణములు అనుక్షణం వారి కుండాలని సుఖ శాంతులతో ఆయురైశ్వర్యములతో వారి పరివారముండాలని మా కైవారము వారికై వారం వారం ( మళ్లీ మళ్లీ ) కోట శర్మ & అనురాధ

నీటిఆవకాయ సార్ధకనామధేయి నేడు నూతననీటిఆవకాయ సీమాంతర గమనానంతరం గృహాగమనం చేసెనని గ్రహించి బహుసంతోషతరంగితస్వాంతుడనై వేగిరమోగిరమారగింపదలంచి ఉష్ణోదనాజ్యజలావకాయ మిశ్రమ మోదకమును మద్దంతాలయమునన్ ప్రవేశింపజేయ జిహ్వస్పర్శనంగావించి రసాస్వాదనానందమున అప్రయత్నంబుగ ఆహాహాయని అరవంగ ఆ థేనుదారఘాటు ( ఆవాలఘాటు ) నాసికారంధ్రములంజొచ్చి కర్ణకుహరద్వయస్ధంభనమున తాత్కాలిక శృతివర్జితుండనైన పిమ్మట తెప్పరిల్లి తేఱుకుని నాకంట నీరు జాలువ్రాలుటనెరింగి ఈ కన్నీరు నీటిఆవకాయ రసాస్వాదనానందభాష్పములా లేక ఆవఘాటుఘాతసంభూతాశ్రుధారలా   యని సంశయించుచుండ నాకనిపించెన్ కంట నీరు రప్పిస్తుంది కాన నీటిఆవకాయ సార్ధకనామధేయియని . ఆవఘాటురసానందం బ్రహ్మానందసమానం నీలకాయమోహనుని భజింతు భక్తులకు కలుగు తురీయం ఆవకాయోదనం భుజింతు భోక్తలకు కలుగు తురీయాతీతం భక్తుల రక్షణార్ధం నీలకాయ భోక్తల భక్షణార్ధం ఆవకాయ ...... కోట శర్మ

లోకమంతా పాకిపోయిన కురుపు కులం మనమంతా ( కులపిచ్చి ఉన్న వాళ్లు ) చేతకాని అర్భకులం   మన మనమంతా కానరాని సంకులం మనమేగా కుల కలతల కారకులం వేడుకోగా గోకులేశుని భారతకులం మనము కామా వాడుకాచే గోకులం మనము కామా కామేశునికర్చకులం మనము కామా జ్ఞానభిక్షకు భుక్కులం వీడిపోదా మనసునిండిన వ్యాకులం ..... కోట శర్మ  

   మండుటెండల తాకిడి తాళలేమింక   పండువెన్నెల లేక నిండుకున్న నెలవంక   వరుణరేడు కరుణపడు గాక నేలవంక   ఇలపైనిండేపాపుల పండే పాపములొక వంక   కాగా, సూరీడు నెలవంకల పై నేలవంక?   ..... కోట శర్మ

సుధకు జన్మదిన శుభాకాంక్షలు తోటకం విజయాతనయా సుధనీవెకదా సుకధాపఠనం శ్రవణం మననం స్తుతిగా నుతిగా నువుచేసెకదా అతిధీ బుధులందరినీ   రుచిగా   సుచిగా నువువండినవంటలతో   ముదమందెనుగా తలమానికమై గమకం తెలుసూ కవనం తెలుసూ లలితా స్తుతిలో సరిరారెవరూ   సుమతీ వ్రతకూ సుగుణా సుధకూ వెలుగొందుసుధా సుఖశాంతులతో మదిలో శివునీ తలచీ కొలచీ . ..... కోట శర్మ

అమ్మా ఆకలిలో శోకములో కోపములో అన్నిటిలో అడుగడున అమ్మా అని అమ్మనే తలచుకొంటూ అమ్మనుమించిన దైవం లేదని మరువనంటూ అఖిలమ్ములో అమ్మలందరికీ అనుదినము మాతలదినోత్సవము కావాలని అనుక్షణం ఆనందము నిండాలని నుతిస్తూ స్తుతిస్తూ అర్ధిస్తూ ప్రార్ధిస్తూ జగన్మాతకు నతత్రాతకు సవినయకరములజోత ... కోట శర్మ

గీతాకారుడి తో మొర విన్నాడను నీ మాటలు   సన్నాయిలా వినిపించెను కన్నాడను సత్యంబును అన్నాడను వదలాలని ( కోరికలు ) చిన్నాడను చీకటిలో ఉన్నానని ఇపుడె తెలుసు కున్నాడను .  అజ్ఞానిని మన్నించుమా విన్నాణము నందిచుమా అన్నన్నా ! ఎన్నెన్ని ప్రాసలు   మున్నెన్నడు లేనివి నీవన్ననె   దొర్లు నన్నా ఇన్నా అనెరుగక .  ఆగక నువ్వోపలేనన్నా నన్నాపమన్నా . అయినా నేనన్నా నా చిన్న ప్రాస కన్నా నీవిన్న విన్ననె మిన్నని . మాయా పన్నాగము ఛిన్నాభిన్నం   సేయగ సన్నుతి చేసెద   కన్నయ్యకు నాకన్నయ్యకు . నాదు డెందమున చిందిన పద పొందికతో మహదానందము పొందిక సందియములొందక అందించెద నంద నందనునికి వంద వందనములు . .... కోట శర్మ

  మత్తేభము బలమందించెను దేశ పోరుకు కవుల్ భావాల బాణాలతో కలమే కత్తిగ జేసి ఊతమొసగన్ కష్టించె నిస్వార్ధులై విలువేలేకనె వ్రాయు కొందరు కవుల్ పేరాశతో, వారి రా తల ఖండింపగ రండహో రచయితల్ ధర్మంబదే నేటికిన్

శా:  నేనే నీకిక  నీవు నాకు యనినే  నీయింటి కొచ్చేయగన్        నేనే నీవిక నీవు నేను అనకన్ నన్నింటికంపించగా        నేనే నాకిక  నీకు నే తగననిన్ నే త్రెంచె నీ బంధమున్        నేనే నీకు విడాకులిచ్చి భరణం నీయింటికే పంపెదన్.. కోట శర్మ

శా: కాఫీ తాగకు సాకు చెప్పి పనులే కావంచు నాఫీసు లో       ఆఫీనమ్మది చిత్తు చేయును సుమా, ఆసాంతమూ దేహమున్       సాఫీగా కసరత్తు చేయ విధిగా సాఫల్య మౌనీ పనుల్       కాఫీ లేకనె పూర్తి చేయు ముసదా కార్యమ్ము నిశ్చింతగా... కోట శర్మ శా: కాఫీ వీడుము మందగించవు మతుల్ కాఫీలు మానేసినన్       ఆఫీనమ్మది చిత్తు చేయును సుమా, ఆసాంతమూ దేహమున్       సాఫీగా కసరత్తు చేయ విధిగా సాఫల్య మౌనీ పనుల్       కాఫీ లేకనె పూర్తి చేయు ముసదా కార్యమ్ము నిశ్చింతగా... కోట శర్మ ఆఫీనము = నల్లమందు